Global.Safari / Multisport.Sør-Afrika / Sjøsnøsurf.Interrail / Golf.Idrett.Sør-Afrika / Idrett.Ball.Sør-Afrika / Låtskriving.Studio.NewYork / Musikk.Friluft.Sør-Afrika / Film.Sunnmøre.Europa / Bo.Aktiv / Leiartrening / Internasjonal linje

Global.Safari

Opplev verda. Reis med hjartet! Global.Safari betyr «den altomfattande reisa».

I Tanzania møter du mennesker som slåss mot ekstrem fattigdom. Samtidig får du med deg solnedgang over løver og giraffar på safari, og på Zanzibar snorklar du i turkisfarga hav.

I Sør-Afrika går du i fotspora til Nelson Mandela, frå Pietermaritzburg der han vart arrestert, til fengselscella på Robben Island. Og i Israel og Palestina møter du folk på begge sider av konflikta som arbeider for rettferd og fred.

Heime i Noreg får du det beste av folkehøgskulelivet og det beste av naturen på Sunnmøre. Det vert eit år der du er mykje på tur. Likevel er kanskje den viktigaste reisa inni deg sjølv.

 

Multisport.Sør-Afrika

På Multisport vert du komfortabel langt, langt utanfor komfortsona! Her får du eit år med sportsprega friluftsliv.

Du ferdast i mektige Sunnmørsalpar, klatrer Bladet i Molladalen og jaktar puddersnø og urørte fjellsider i kvasse vestlandfjell. Du måler krefter med storhavet på eit surfebrett i Hoddevika eller på vannski bak ein RIB-båt med 300 hk inn vakre Hjørundfjorden.

I Sør-Afrika er det tid for kitekurs, ATV, fallskjermhopp, terrengsykling, zipline, surfing og verdas høgaste strikkhopp.

Rundt leirbålet heime finn du ei eiga ro og deler dagens oppturar og nedturar med gode klassekameratar. På bålet blir middagen tilbereda og du sovnar mett, sliten og tilfreds i ein sovepose under stjernehimmelen.

I morgon ventar ein ny fullspekka dag.

 

Sjøsnøsurf.Interrail

Vestlandet byr på eit hav av freistingar. Her er det skikkelig uvêr og det bles nordavind frå alle kantar. Heldigvis! Då er du i ditt rette element.

Det merkar du når du surfar di fyrste grøne bølgje i Hoddevika eller på Sardinia i Middelhavet. Den gløymer du aldri. Du er óg i ditt rette element når du tek på deg våtdrakta og dykkar ned i ei ny verd. Ei verd av klart vatn, fargerike manetar, fiskestimar og nysgjerrige selar.

På vindfulle dagar får du friske opplevingar i seglbåt eller i ein RIB med 300 hestekrefter. Og på godversdagar padler du kajakk og ser kvitkledde Sunnmørsalpar stupe rett ned i fjorden. Det danner vakre rammer for Oppdrag Hjørundfjorden og skiglede i urørte fjellsider.

Turen til Sardinia er ein to veker lang tur med tog gjennom Europa for å oppleve dagar med surfing, segling, padling og klippehopp, men også med mat, kultur, menneskemøter og tett fellesskap.

Det er på slike dagar du tenker: ”Himmel og hav for eit år det skal bli!”

 

Golf.Idrett.Sør-Afrika

Denne linja har ingen ”hole-in-one”-garanti. I staden kjem vi med ein ”all-in-one”-lovnad. For her speler du ikkje golf heile året.

Utanfor golfsesongen vil ballspel og ski/snowboard dominere, medan aktivitetar som surfing, paragliding og paintball spriter opp kvardagen og klassemiljøet.

Sør-Afrika tilbyr fantastiske golfbaner, golfundervisning for born i townships og det er mogleg for adrenalinkick med strikkhopp eller dykking med kvithai.

På Sunnmøre Golfklubb vil både den etablerte golfar og nybyrjaren få god instruksjon av ein lærar med 4,5 i handicap og klubben sin PGA-pro. Vi spelar på ulike baner på Sunnmøre og Sør-Afrika og reiser på trenings­leir til Spania på vinteren.

På Sunnmøre Golfklubb har du gratis ­spelerett. Den ligg berre eit langt utslag frå skulen.

 

Idrett.Ball.Sør-Afrika

Du vil helst vere i aktivitet. Med eller utan ball. Anten det er i gymsalen, på kunstgrasbana, i treningssenteret eller i friluft.

I Sør-Afrika får du høg puls og bankande hjarte. Det skjer i verdas lengste strikkhopp på 216 meter og i møte med menneska i «Homeless Soccer»-prosjektet i Townshipen i Cape Town.

I løpet av året vil du kjenne den gode kjensla når du set spor i urørt puddersnø. Spenninga når paraglideren får luft og bølgja tek tak i surfebrettet. Smerta over ei litt for hard takling eller når ei paintballkule treff deg i ryggen.

Gleda over eit drømmetreff på fotballbana. Ikkje berre i 2 x 45 minutt, men eit heilt år. Eit heilt år med garderobestemning, samhald og gode lagkameratar.

 

Låtskriving.Studio.NewYork

Drøymer du om å lage eigen musikk? Eller har du allereie sjølvskrivne låtar? No er tida er inne for å la andre høyre musikken din!

I samspel med kvarandre jobbar vi med å skrive, utvikle, produsere og spele inn eigne låtar. I vårt nye studio lærer du meir om musikkproduksjon, opptaksprosessar og miksing. Kanskje vil resultatet havne på Spotify, Tidal eller Urørt?

Saman med klassa reiser du på tur til New York. Der møter du dei nyaste trendane i musikkbransjen, samtidig som du får oppleve heftig storbypuls og hente inspirasjon til eige arbeid.

Denne linja har ein del av undervisninga i lag med ei anna musikklinje på skulen, og tilbake på skulen dannar de ulike band og har felles konsertframsyningar.

Instrument, Mac’ar og Logic står til fri bruk.
Resten er opp til deg sjølv.

 

Musikk.Friluft.Sør-Afrika

Musikk feat. Friluft
Meir enn berre musikk

Dei fleste linjedagane er du i øvingslokala, i studio eller på scena. Her kan du utvikle deg på det du allereie er best på. Om gitar er hovudinstrumentet ditt, er det likevel ikkje usannsynleg at du sit bak trommesettet på huskonsertar og jamsessions.

Du vil få lære meir om låtskriving, opptak og miksing. Instrument, Mac’ar og Logic står til fri bruk. Når låta di er spelt inn, er det tid for musikkvideo. Og i januar har heile skulen ei musikalframsyning for 2500 tilhøyrarar i kulturhuset.

På Noregs kanskje mest aktive musikklinje får du likevel enda meir. På go’versdagar blir du gira av kajakk, ski, surfing og klatring. Og på studieturen til Sør-Afrika får du ulike workshops, konsertar, vertsfamiliebesøk, Robben Island, fallskjermhopp, strikkhopp og haidykk.

Dette er eit år der musikk vert miksa med dei beste friluftslivsaktivitetane Sunnmøre og Sør-Afrika har å by på.

 

Film.Sunnmøre.Europa

Den eine dagen står du i laussnøen på Strandafjellet og filmar skikøyrarar. Saman med deg har du eit crew av klassekompisar.

Ein annan dag hoppar du i havet i Hoddevika med ein av landets besteundervassfotografar. Over deg leikar surfarane seg. Under deg svømmer fiskestimar. Vèl heime fortset prosessen frå opptak til redigering og ferdig film.

Så er du klar igjen. Klar for nye oppdrag. Klar for å lage ein musikkvideo eller ein fleirkameraproduksjon. Klar for å lage dokumentar frå stadar på Sunnmøre eller på interrail gjennom Europa. På denne linja blir du ikkje berre ein betre filmskapar. Du får óg eit folkehøgskuleår med turar og opplegg saman med dei andre linjene.

Her er det berre å pakke tursekken og filme ditt beste år!

 

Bo.Aktiv

Det er godt å ha ekstra støtte når du skal prøve noko nytt i kvardagen.

For nokon kan det vere å ta kontakt med andre, å gjere daglege aktivitetar eller å reise. For andre kan det vere å få meir sjølvtillit i ulike situasjonar.

På Bo.Aktiv får du undervisning i trygge omgjevnadar i eit stort felleskap. Du trenar på å bu åleine, er saman med andre ungdomar og får prøve ut eit mangfald av aktivitetar. Du set deg eigne mål og undervisninga blir tilpassa deg.

Vi trur at du saman med oss vil oppleve meistring og glede, og at du vil oppdage nye sterke sider ved deg sjølv.

Saman får vi utrulege ting til å skje!

 

Leiartrening

Du har kanskje slått det fast allereie: Det held ikkje med éit år på folkehøgskule. Du vil ha meir!

Du vil vere andreårselev – eller stipendiat som det blir kalla i folkehøgskulen. Dette er eit år med fokus på  teoretisk leiartrening og praksis som vegleiar. Som ven og  rettleiar kjem du tett på elevar og tilsette.

Du vil få medansvar for det sosiale skulemiljøet og får oppgåver knytt opp mot den praktiske skulekvardagen. Av den grunn betaler du ikkje skulepengar. På denne linja vil søkjarane bli intervjua og det er begrensa plassar.

 

Internasjonal linje

Internasjonal linje er eit halvårskurs som har base på skulen. Du vil jobbe med eit lokalt utgangspunkt og eit globalt perspektiv.

Halvårskurset er knytt opp som del to av programmet Communication for Change (CFC) til KFUK/KFUM der du på hausten er utplassert i eit av partnerlanda. Du treng likevel ikkje å ha fylgt dette programmet for å gå internasjonal linje.

For meir informasjon om CFC, sjå deira heimeside.

Halvårskurset er lagt opp som ei god blanding av praktiske erfaringar, foredrag og refleksjonar i grupper. Gjennom året på internasjonal linje vil du ha praksisplass hjå KFUK-KFUM  samt lokale aktørar på Sunnmøre. Linja opnar også opp for eit møte med norsk kultur og natur der du får ta del i fellesopplevingar med andre elevar i den storslåtte sunnmørsnaturen.